Rannsóknarnefnd rannsaki kynfræðslu í grunnskólum – Katrín Jakobsdótir ber ábyrgðina

Ritað þann 15. september 2023 af Jóhann Kr. á vefsíðu Útvarps Sögu

Þingsályktunartillaga Katrínar Jakobsdóttur um aðgerðaráætlun gegn hatursorðræðu er aðför að tjáningarfrelsinu á Íslandi. Forsætisráðherra ber líka ábyrgð á þeim siðferðisbresti sem kemur fram í kennsluefni í grunnskólum um kynfræðslu ungra barna. Þetta var meðal þess sem fram kom í máli Eyjólfs Ármannssonar þingmanns Flokks fólksins í þætti Arnþrúðar Karlsdóttur.

 Hatursorðræða óskilgreind í tillögunni

Eyjólfur segir að það sé sérkennilegt að setja slíka tillögu fram í ljósi þess að ekki sé til nein skilgreining á því hvað telst hatursorðræða samkvæmt tillögunni. Hann segir ýmsar skilgreiningar til hvað þetta varðar t,d refsilagaskilgreining og alþjóðleg skilgreining og fleiri skilgreiningar.

“ en þeir eru bara ekkert með það á hreinu hvaða skilgreiningu þeir ætla að nota í aðgerðaráætlun gegn hatursorðræðu “ segir Eyjólfur.

Arnþrúður segir að þess í stað sé notuð stimplun og slaufun gagnvart fólki, einstaklingar séu teknir fyrir og sakaðir um að vera með hatursorðræðu án þess að þeir sem leggi fram tillöguna og geti skilgreint það sjálfir.

Katrín Jakobsdóttir ábyrg fyrir kláminu í grunnskólum

Í þættinum kom fram að þessi tegund af kynferðisfræðslu sé innflutt af Katrínu Jakobsdóttur forsætisráðherra sem leggi blessun sína yfir framkvæmdina. Hún sé orðinn velsældarsendiherra Alþjóðaheilbrigðismálastofnunarinnar WHO sem sé á kafi í því að leggja drög að því hvernig kynningarefni á kynlífi skuli háttað í barnaskólum. Með hliðsjón af því efni sem hefur verið dreift í fjölmiðlum og á samfélagsmiðlum þá gæti þetta mögulega verið blygðunarsemisbrot samkvæmt ákvæðum almennra hegningarlaga. Katrín hefur áður sagt að hún sé að breyta menningunni í landinu og þetta gæti hæglega verið hluti af þeim áformum.

Nota Samtökin 78 til að taka skellinn

„það er komin út kennslubók sem samin er af einum kanadamanni og þýdd hér af ákveðinni konu. Menntamálastofnun gefur kennslubókina út og það virðist ekki einu sinni vera hægt að fá að vita hvað verið sé að gera. Þetta er það sem hefur verið leitt inn í landið af forsætisráðherra og ef þú gagnrýnir þetta þá ertu sakaður um hatursorðræðu. Síðan eru stjórnvöld að nota Samtökin 78 og þau látin taka skellinn sem þau ættu að taka sjálf, bæði forsætisráðherra og menntamálaráðherra “ Samtökin 78 komi ekki nálægt þessu kennsluefni heldur setur Menntastofnun kennarana í þessa stöðu að kenna efni sem er á mörkum siðferðismarka.

Kennslubókin ætluð 7 til 10 ára börnum

Eyjólfur segir bókina, sem er ætluð sjö til tíu ára börnum, vera þannig útfærða að ef hann ætti barn á þessum aldri myndi hann ekki vilja að það myndi skoða þessa bók. Hann segir að foreldrar hljóti að mótmæla þessu í hrönnum því það særi blygðunarsemi fólks við það eitt að tala um bókina.

“ þarna er verið að tala um stinningu kynfæra og sjálfsfróun og snertingar við endaþarm. Ég verð að segja að mér var algjörlega misboðið þegar ég sá þetta og ég ætla að vona að foreldrar sem eiga börn á þessum aldri rísi upp og mótmæli þessu “ segir Eyjólfur.

Menntamálaráðherra og ríkisstjórnin öll ber ábyrgð á málinu.

“ þetta sýnir bara að það sé annað hvort alger siðferðisbrestur í gangi eða algjör skortur á sómakennd að það skuli vera að bjóða börnum upp á þetta. Í raun ætti að setja á fót rannsóknarnefnd og rannsaka þetta nánar. Ráðherra sem grípur ekki inn í svona, á bara að snúa sér að einhverju öðru. Þetta er móðgun við foreldra í landinu og móðgun við íslenskt samfélag “ sagði Eyjólfur að lokum

Hlusta má á þáttinn í spilaranum hér að neðan